夺标大热门曼城作客斗英冠史云斯，「蓝月亮」曼城今季目标直指「四冠王」，就算面对低别组对手亦唔会放软手脚，不过「天鹅」史云斯对上3圈英足盃皆以大比数胜出，攻力有番咁上下，曼城作客让两球、两球半太辣，改捧3.5球大盘仲划算。
（周日凌晨1时20分开赛，马会网上文字直播）
喺英超领导群雄嘅曼城早前已经率先捧走英联盃，加上周中欧联16强次回合以7比0大炒史浩克04，两回合计赢10比2进身8强，有机会史无前例单季独揽4大锦标。曼城领队哥迪奥拿早前曾经讲过，佢哋唔会放弃任何锦标，因为「蓝月亮」历史背景唔及巴塞、皇马、曼联或利物浦等传统大球会，捧盃次数远远不及，因此每个冠军对曼城嚟讲同样咁重要，所以球队唔会拣波踢。
睇番曼城今届晋级过程，对上3圈先后7比0狂数洛达咸、5比0大炒般尼、4比1击败纽波特郡，3场加埋入咗16球，过程完全冇放软手脚，更何况以目前曼城嘅板凳深度，就算阵容轮换，战斗力都唔会相差太远，等閒球队好难招架。
史云斯对赛惯性斗攻
史云斯现排英冠第15位，既无机会争升班，护级压力亦不大，今场冇心理包袱下可放手一搏。史云斯于今届英足盃晋级路途从未遇过英超兵，但之前3圈合共轰入11球，锋力相当不俗，而且史云斯未降班前，近4次于英超斗曼城有3次开4球或以上，而且单计主场，史云斯最近6次斗曼城亦只有1次交白卷，经常合演对攻好戏，既然大细中位数3.5球有1.85倍，不如改捧入球大仲稳阵。