施丹回归 重新上弹
今晚西甲瞩目战，名帅施丹重掌「银河舰队」帅印后第一炮，皇家马德里主场迎战切尔达。皇马今季动荡不安，搞到要「翻挞」施丹稳定军心，今场对住近况低迷嘅切尔达，众将肯定全力抢头威，让球主客和「-2」照捧主队！
（Now 632周六晚11时15分直播）
够威望平息更衣室内乱
施丹领军功力唔使多讲，单係缔造欧联3连冠已经上晒神枱，不过佢上季季尾后不满球队现状，毅然急流勇退，「银河舰队」今季同时冇咗C朗同施丹后即时「沉船」，西盃及欧联出局，联赛亦大幅畀死敌巴塞抛离，洛佩特吉同苏拿利先后败走帅位，面对球会空前困境，会长皮里兹惟有硬住头皮搵施丹出山，更赋予「丹爷」前所未有大权。
查实欧联出局后，皇马内部迅速陷入四分五裂惨况，亦只有施丹嘅威望，先平息到更衣室内乱。佢首课操练就向球员落柯打，讲明要有尊严咁完成今季赛事。当中今季不获重用嘅艾斯高同基罗拿华斯等人，有望重新上位，队长沙治奥拉莫斯亦坐完波监复出，肯定希望喺巴拿贝踢番场争气波。
切尔达现时排尾3护级水深火热，自然想有分落袋，可惜佢哋近11仗联赛输9场，加上队长伊亚高艾斯巴斯仲因伤继续倦勤，根本难同皇马周旋。佢哋近5次联赛作客皇马全败，其中4次输3球或以上，今晚注定又大败而回。