礼拜六又有好节目，东网将会一连两晚免费直播德甲，今晚先上演弗赖堡主场迎战哈化柏林，我哋安排咗英语旁述，两军实力接近预期会有一番恶斗，睇番双方近况同往绩，今场都係难分高下格局，黑柴推介3.15倍和波。（on.cc东网周六晚10时30分直播）
双方近5场联赛都仅1败，状态斗心都对办，除非遇上实力高一皮嘅劲旅，否则绝对唔易输波，哈化上轮击败缅恩斯，歇冬后连盃赛8战只输过畀大勇嘅禾堡同班霸拜仁慕尼黑；弗赖堡上轮作客输畀实力明显喺佢哋之上嘅利华古逊，今晚返主场预期又会有较佳演出。睇番目前联赛榜，弗赖堡排13位但已弹甩尾3嘅史特加8分，护级压力唔大，哈化排第8但已落后第6嘅利华4分，争前6机会唔高。
两军主帅同抱谨慎态度
赛前两军教头都对今仗抱谨慎态度，弗赖堡教练史特拉治话：「我哋当然想喺主场赢波，但哈化嘅质素比过去有所提升，我只能够讲会战斗到最后，目标係起码要攞到分！」哈化主帅戴达就话：「我唔想预测胜负，但有统计数据话我听，原来哈化係今季德甲除史浩克04外跑动最少嘅球队，咁样唔得！我会要求球员跑多啲。」
双方今仗都面对一啲伤兵问题，当中最受注目嘅係哈化当弗前锋戴菲沙尔基因伤缺阵，翻查两军交手往绩，近9次对赛竟然有6次和气收场，包括近3度交锋全数和波，要注意德甲和波率一向唔高（今季至今25%），所以和波赔率会开得偏高，但今场和波只得3.15倍，不但係今轮最低，甚至係今年各场德甲开盘后和波赔率最热一次，黑柴建议跟番一票。