除咗西甲国家打吡，意甲亦有「首都打吡」——拉素对罗马。罗马挟4连胜气势斗拉素，而且今场只係挂名作客，同样喺奥林匹高球场作赛，唔会影响表现，罗马攻击点多，迪斯高、艾沙拉维、高拉洛夫同尼高路辛尼奥路近仗轮流士哥，面对近4战只得1和3负嘅拉素，平手盘绝对要捧场。
（Now638、有线614及654台周日凌晨3时30分直播）
「首都打吡」向来场外场内都多新闻，就喺今场比赛前两日，市内多处出现反犹太主义涂鸦，罗马市警方要嗱嗱声搵人清洁。两军都有好多极端主义球迷支持，所以「蓝鹰」对「雌狼」胜负嘅重要性，犹如边队先至可以代表罗马市嘅强者。
拉素近4仗死晒火
不过，论到双方近况，罗马似乎更胜一筹，开波前佢哋正式从阿特兰大买断中场白赖仁基斯坦迪，中前场调配更得宜。球队连欧联在内取得4连胜，合共射入10球，中前场明显上晒力，相反拉素近4场1和3负，合共只入得1球，前锋忘记带射门鞋，好难顶住罗马。