3日前炒起皇马
西甲国家打吡Round2一触即发！「银河舰队」皇家马德里会喺周日凌晨主场迎战巴塞隆拿，呢场係双方4日内第2度交手，上场巴塞喺西班牙盃4强次回合作客大胜3比0，赢得充满说服力，以皇马今季表现，匆匆再战好难有突破性演出，平手盘继续撑巴塞。
（Now 632周日凌晨3时45分直播）
皇马目前喺西甲排第3，唔单止落后巴塞9分，连2哥同市宿敌马德里体育会都不如，要问鼎联赛锦标机会相当淼茫，佢哋上场联赛多得VAR「眷顾」，先至凭两个12码险胜利云特，再睇埋之前一仗联赛，竟然喺主场倒灶以1比2输畀赛前10场不胜嘅基罗纳，可见皇马今季联赛表现几咁不济。
讲番周中嗰场西盃4强次回合，巴塞凭苏亚雷斯梅开二度，加上华拉尼嘅乌龙波，作客以3比0大胜皇马，两回合计赢4比1进身决赛，不过最大功臣可能係法国小将奥士文尼迪比利，因为巴塞头两个入波，都係靠佢先后喺左、右两边传中，加盟巴塞以来表现愈踢愈好，加上美斯上场联赛对住西维尔更交出「球王级」演出，喺球队两度落后下连中三元，带领巴塞反胜4比2，状态一流。
近5次访巴拿贝赢4场
睇番巴塞最近5次作客巴拿贝只输一次，当时係上季初嘅西班牙超级盃，其馀4次联赛加盃赛，巴塞全部赢晒之馀，每场更至少轰入3球，完全无惧对手主场威势，平手盘必捧巴塞。