今晚尾场压轴戏，慕逊加柏主场火併拜仁慕尼黑，拜仁近季喺慕逊加柏身上吃尽苦头，除咗近4次作客普鲁士公园球场只得1胜外，首循环主场出击竟然都吞咗慕逊加柏3蛋，绝对係奇耻大辱，今晚必趁欧联休战可以集中精神备战，全力争胜力追榜首多蒙特之馀，亦要向慕逊加柏大报复，遇啱主队近期状态严重走样，拜仁让一球要撑上盘。
（on.cc东网周日凌晨1时30分直播）
拜仁上轮主场几经艰苦以1球险胜哈化柏林，维持同榜首多蒙特仅3分差距，要知道今季哈化遇强愈强，拜仁能够成为首支击败佢哋嘅前3名球队已经收货，球队喺过去同嚟紧嘅周中都唔需要比赛，有更多时间准备今仗，教练尼高高华亦终于从善如流，畀级数经验都顶级嘅查维马天尼斯担正防守中场，佢喺对利物浦嘅欧联表现固然抢镜，上轮对哈化仲为球队奠定胜局，拜仁终于搵啱中场阵容，虽然今仗几名翼锋洛宾、列贝利同京士利高文因伤缺阵，但汤马士梅拿同基拿比级数都唔使怀疑，加上近期复受重用嘅占士洛迪古斯派牌，箭头罗拔利云度夫斯基唔忧冇供应。
慕逊加柏严重跌Watt
慕逊加柏开季后一直稳定，但踏入二月忽然大跌Watt，前线三叉戟杜根夏萨特、史甸度同柏利亚齐齐冇货交，中后场球员状态亦突然下滑，令呢支原本喺主场9战全胜嘅「主场王」，喺主场连续两场惨吞3蛋，对手仲係攻力唔算强嘅哈化柏林同禾夫斯堡，阵上完全进退失据，表现之差可以用得人惊嚟形容，相信教练赫基需要时间重拾战将信心，喺呢个时候遇上回起嘅班霸拜仁注定冇运行啦！