今晚西盃4强次回合续演国家打吡，轮到皇家马德里返主场迎战衞冕嘅巴塞隆拿，亦係今季第3次国家打吡。首回合皇马作客逼和巴塞1比1，抢到1个作客入球略佔先机，不过巴塞有美斯助阵火力劲爆，而且今届西盃多次上演绝地反击，今场必狂攻博出线，加上「地上最强」近年造访巴拿贝球场常演大骚，捧2.5球嘅入球大最正路。（周四凌晨4时开赛）
美斯弗爆作客照攻
今季首次国家打吡，皇马作客巴塞惨败1比5，时任教头洛佩特吉随即落镬，「新舰长」苏拿利贵为皇马名宿，梗係知国家打吡嘅重要性，佢带队喺西盃4强首回合作客逼和巴塞1比1，今场回师主场再战死敌，虽然0比0都可晋级，但以「银河舰队」近5场皆有失波嘅防线，绝对唔会玩死守。皇马新星云尼斯奥斯祖利亚愈踢愈顺，伙拍重拾射门鞋嘅宾施马，随时以攻代守。
衞冕冠军巴塞上场联赛作客西维尔，喺落后情况下反胜对手4比2，球王美斯连中三元弗到漏油，加埋苏亚雷斯同奥士文尼迪比利支援，势必火力全开。「地上最强」今届西盃常演绝地反击，之前2圈对利云特同西维尔，都喺首回合落后下反胜晋级。何况巴塞近7次作客斗皇马6次开3球或以上，2.5球嘅入球大乃不二之选。