主队费伦各项赛事近9仗不败，不过只赢得4场，其馀全部和波，皆因后防甩漏多，上仗联赛面对国际米兰，费伦开波冇耐就领先，畀对手连入3球，好彩一班攻击手够争气追番2球，最终和3比3，加上球队早前于8强曾以7比1横扫罗马，绝对係典型攻强守弱嘅球队。呢场队长兼后防核心谢文比薛拿继续有伤倦勤，防线依然隐患无穷，相信「紫百合」都会以攻代守，靠基奥云尼施蒙尼等前锋揾食。
双方8强战大炒劲旅
阿特兰大虽然近期状态有所回落，不过佢哋喺早前8强都曾爆出惊喜赛果，以3比0淘汰卫冕嘅祖云达斯，球队实力绝对不容小觑。值得留意，队中阿根廷攻击核心艾真度高美斯已经伤愈归队，有呢位矮脚虎喺中场派牌，阿特兰大进攻瓣数即刻丰富唔少，尤其近14次上阵狂轰18球嘅哥伦比亚射手杜云沙柏达喺前场肯定受惠。呢场两队攻力强劲嘅球队相遇，一班球迷绝对可以买定花生等睇入波。