德甲独脚戏，RB莱比锡主场迎战贺芬咸，两军一向都係进攻足球拥护者，近期前线亦着晒火，不过防线同样遇到唔少问题，而且两军为争下届欧战席位都不甘和波，今晚两支同样攻强守弱球队对决注定係入球骚，黑柴推介有两倍嘅中位数3.5球大盘。
（Now 670、有线651及611台周二凌晨3时30分直播）
两军上轮都喺弱旅身上攞足信心，莱比锡作客赢史特加3比1，弗爆射手尤素夫保臣梅开二度，当家射手迪姆华拿亦贡献助攻，配合弗爆嘅沙比萨同新星干拉特赖马等攻击手，主场出击火力有保证，不过防线支柱乌柏美卡奴仍然养紧伤，今仗攻得急未必可以保住不失。
迪米亚巴尔撑起贺军火力
贺芬咸情况相近，上轮派3蛋轻取汉诺威根本赢得少，皆因全场仲有3次射中门框，好运啲随时炒半打，今季冒起嘅箭头贝科迪尔愈战愈勇，佢拍住卡拉马历同祖连顿组成贺芬咸三叉戟，今季喺德甲合共入咗22球，球队仲唔係靠晒佢哋入波，英格兰优质小将雷斯尼尔逊同埋喺后备席上嘅强力中锋施沙拉尔一样有火，不过全队最煞食嘅係中场迪米亚巴尔，呢位串连攻守嘅无名英雄至係前线几台大炮嘅火力泉源，不过由于踢法开放，佢哋作客係前10名球队中失波最多一队，球队目前联赛榜排第8位，想踢下届欧霸要全力追分，好在各项盃赛已毕业可以专心联赛，今晚必定会同莱比锡驳火争胜。
睇番双方历来5次联赛交手，总入球都係3球或以上，当中3次达到4球或以上，包括上季贺芬咸作客赢5比2，今晚重临莱比锡嘅红牛球场，注定又係一场入球骚。