3大森巴兵对办
连续两季日职盟主川崎前锋，今日下午展开衞冕第一击，于主场同FC东京合演「多摩川打吡」。前锋上场于日超盃击败浦和红鑽先拔头筹，新兵李安度达美奥即有货交，而且近4季喺日职开咧战均顺利赢波，面对近年交手赢多输少嘅东京，有力打响头炮，主胜捧得过。
（有线662及602台周六下午1时直播）
之前经常做二奶嘅前锋，近2季成功称霸日职坚难得，今季保留对上2季嘅夺标功臣，除右闸艾辛奴费拉拿转投清水心跳，其馀主力包括首席射手小林悠、上季日职最有价值球员家长昭博及老将中村宪刚仍在阵中，默契唔使怀疑。
唔只咁，佢哋季前亦引入3名巴西新外援，其中名气最大嘅前锋李安度达美奥，即时喺上场日超盃一箭定江山，协助前锋以1比0击败浦和红鑽捧盃，呢位2012年为巴西夺得伦敦奥运银牌兼攞埋神射手嘅前锋，极速融入，另外2名森巴兵谢斯尔及马坚奴则主力防守，无论攻守战力都显着提升。
FC东京「日本美斯」担正
FC东京上季联赛排名第6，成绩唔差，新季佢哋补入甘美奥前锋谢尔费拉拿、鸟栖砂岩前锋田川亨介等新兵外，仲有结束外借由西甲巴塞隆拿回流嘅久保建英，据报今仗呢位有「日本美斯」之称嘅17岁小将仲会打正选，争取打破最年轻揭幕战入波纪录。不过，FC东京始终有巴西外援连斯利马、前锋富樫敬真、中场米本拓司离队，阵容大变下磨合需时，呢场波实不宜高估。
况且喺往绩方面，前锋近4季联赛首战全部赢波，非常抢缰，加上两军近4次交手，前锋亦取得3胜摆明格食格，相信可旗开得胜，主胜有计。