留力英联盃Hea斗马模
今晚欧霸盃32强次回合，车路士返主场再斗马模。首回合赢波嘅车仔，日前喺英足盃畀曼联踢出局，嚟紧又有英联盃决赛大战曼城后顾之忧，领队沙利为保帅位，今仗随时留力，面对联赛未开咧嘅马模，随时合演闷波一场，入球细（2.5球）乃不二之选。
（Now 643、有线656及616台周五凌晨4时直播）
车仔依家处于多事之秋；先讲战绩，近8仗只得4胜4负，其中不乏惨吞般尼茅夫4蛋及曼城6蛋嘅耻辱败仗，日前喺英足盃16强以0比2输畀曼联。嚟紧周一凌晨仲要喺英联盃决赛硬撼曼城，呢场被视为领队沙利保帅位嘅最后救赎机会，一旦输埋，呢位意大利教头将难逃被炒厄运。相比之下，今仗对车仔嘅重要性就冇咁大，毕竟首回合作客赢2比1，领先兼有2个作客入球喺手，今仗和波或输0比1亦可晋级，加上佢哋今季出战欧霸盃都係派副选居多，预计夏萨特、希古恩等主力唔会披甲。
蓝战士但求稳阵出线
马模唔单止实力输几条街，而且其所属嘅瑞典超仍未开咧，状态唔慌好得去边，就算想收复失地，恐怕有心无力。当然，车仔都唔想大意畀马模踢出局咁肉酸，相信今仗会稳稳阵阵，但求保住优势出线，不致于喺英联盃决赛前再受打击，影响士气，入球细（2.5球）有2.33倍分头不容错过。