追榜首1分唔够喉
今午澳职大战，威灵顿凤凰主场硬撼联赛「2哥」墨尔本胜利。胜利上仗输畀「1哥」珀斯光辉，争标机会大受打击，好彩有日本仔本田圭佑伤愈复出，实力有保证，对住表现飘忽嘅凤凰，赢波冇难度，客胜唔好错过。
（Now 639、有线615及655台周五下午2时35分直播）
联赛紧咬「1哥」珀斯光辉嘅胜利，上仗交手以1比2输波，两队分差拉开至7分，喺常规赛只剩9轮嘅情况下，嚟紧仲想争冠军真係1分都唔少得。总结上场比赛，托禾伦缺阵肯定对球队有好大影响，呢位前瑞典国脚嚟紧呢场都好大机会继续倦勤，好彩抖咗一排嘅日本球星本田圭佑终于复出回归大军，有佢喺中场拍板喂波，巴巴路西斯等前锋肯定受惠，相信佢哋依然有足够火力抢分。
凤凰表现飘忽
凤凰上场作客1比1逼和纽卡素喷射机，近5场联赛赢得1场，其中前锋基舒拿继上月对FC悉尼一役后，上场再喺比赛末段射失12码，成为球队失分罪人，令班波士气大受打击。况且排名联赛第6嘅凤凰，依家抛离第7位嘅纽卡素喷射机成8分，进军季后赛形势乐观，呢场面对劲旅都唔使搏得太尽，宁愿捧客胜好过。