力争欧联4连霸嘅皇家马德里16强对手係阿积士，首回合会先作客荷兰阿姆斯特丹。虽然论牌面，今场可以话係16强中最悬殊嘅对赛组合，不过今届皇马欠缺施丹同C朗，确係冇咗一份霸气，而且去到淘汰赛阶段，步步为营好紧要，所以皇马近3届16强共6场赛事，就有5次半场同对手打和，今场不妨再向半场和埋手。（Now 644、有线662及602台周四凌晨4时直播）
阿积士曾经係4届欧洲盟主，虽然最近1次进身16强已经数到2005/06球季，不过，阿积士今届分组赛6战3胜3和未输过，能够相隔13年再闯16强绝非侥倖，唔少球评家都讲过「欧联淘汰赛冇弱旅」，此话绝对可以提醒一众球迷，唔好太过盲目捧所谓传统豪门。
苏拿利领军求稳阵
事实上，今季皇马因为冇咗施丹同C朗，球会唔使再喺镁光灯下比赛，确係冇咗啲霸气，但正正合晒主帅苏拿利稳稳阵阵嘅执教手法；其实低调嘅皇马成绩绝对唔失礼，近7仗6胜1和，包括西班牙盃1比1打和巴塞，以及作客3比1击败马体会。
皇马除咗连夺3届冠军，近3届16强面对罗马、拿玻里及巴黎圣日耳门更录得6战全胜，主、客场表现分野不大，6场比赛中有5次开出半场和，呢个亦正正符合苏拿利嘅手法。欧联两回合制，首回合最紧要稳阵，相信今场半场和机会仍然高唱入云。