苏B行运行到脚趾尾
欧联16强首回合今晚正式开打，重头戏梗係弗到爆嘅曼联主场火併巴黎圣日耳门（PSG）。红魔嘅看守领队苏斯克查真係行运一条龙，接手后除咗保罗普巴、拉舒福特等个个翻生之外，咁啱撞正PSG有尼马、卡云尼齐齐受伤，挟近11场赢10仗嘅强势，可藉地利响头炮，宁买当头起，曼联小让平半必捧上盘。
（Now 643周三凌晨4时直播）
巴黎圣日耳门上年12月欧联抽中对嗰阵沉到爆嘅曼联，外界异口同声话佢哋抽到好籤，当时苏斯克查仲喺挪威家中食花生睇紧抽籤，估唔到依家要领军出战PSG，而红魔喺「苏B」接手后11仗取得10胜1和不败佳绩，重新杀上联赛前4，表现全面回勇，实在係世事如棋。
喺「苏B」麾下，同前任主帅摩连奴不和嘅保罗普巴即刻大爆发，近9场有披甲赛事入8粒兼有5次助攻，「福仔」拉舒福特、安东尼马迪尔亦频频入波，成队波脱胎换骨，依家边队对佢哋都惊，同抽籤嗰阵截然不同。
麦巴比独撑圣日耳门
苏斯克查唔单止识教番好队波，仲要「红」运当头，因为PSG有王牌尼马因蹠骨受伤要长抖，今仗肯定缺阵，失去呢位进攻核心，不但畀里昂打破联赛不败身，法足盃对丙组球队维利法兰，喺法定时间竟互交白卷，要到加时先赢波晋级，可见影响好大。
正所谓屋漏偏逢连夜雨，巴黎圣日耳门喺日前联赛对波尔多，另一箭头卡云尼又整亲大腿肌肉，加上后衞梅尼亚喺碰撞中出现轻微脑震盪，两人今仗应会倦勤，前线得番基利安麦巴比单打独斗，实力大减，真係连个天都帮埋「苏B」。翻查纪录，原来曼联喺主场对住法国球队取得10胜3和不败，今仗让平半都冇有怕，上盘有买趁早。