车仔将帅贴错门神
今日大年初六，乐比先同大家拜个年，祝各位读者财源广进，波运亨通、身体健康。今晚英超大战曼城主场对车路士，虽然曼城让到一球，但乐比依然睇好上盘；车路士近期表现飘忽，好大程度同将帅不和有关，连头号球星夏萨特都有离心，队波唔团结好难阻到曼城争标，加上防线充斥问题，相信曼城可赢波全力冲刺。
（Now 621周一凌晨零时直播）
未计周六赛事，车路士落后榜首12分之多，今季目标都係馀下3大盃赛，尤其係联赛盃决赛将于今个月尾举行，如果拎到呢隻盃仔嘅话，分分钟可保住领队沙利份工，所以联赛对车路士嚟讲，只能够讲係尽力而为，绝对冇曼城咁重视。
蓝战士作客跌Watt
车路士自踏入2019年后状态好唔稳定，上月尾惨吞般尼茅夫4蛋，表现认真得人惊，虽然上仗以5比0大胜哈特斯菲尔德看似反弹，但哈仔今季长期积弱，车仔主场大胜只属正常发挥，况且车仔今季主场同作客表现有好大落差，今仗又轮到作客随时表现走样。
事实上，车路士今季作客Big6成绩令人失望，联赛先后输过畀热刺、阿仙奴，联赛盃4强亦输畀热刺，几场败仗都输得肉酸，可见佢哋今季面对逆境嘅能力甚差。
车路士今季防线极唔稳阵，一对中坚大衞雷斯同鲁迪格固然甩漏甚多，作为世上最佳防中嘅尼高路简迪又改踢攻击中场位置，对住曼城呢啲高级数球队，真係唔知要输几多粒。最惨係近月不断传出领队沙利同球员不和嘅消息，夏萨特来季转投皇马嘅消息亦甚嚣尘上，呢啲负面新闻都好影响车路士近期嘅作战状态，即使沙利爱将希古恩加盟冇耐已开斋，但进攻问题远远唔及防线问题咁严重。
心水波胆3比1
曼城今季主场对Big6表现相当对办，先后击败曼联、阿仙奴同利物浦，表现绝不拖泥带水，周中对爱华顿赢2比0可以话睇定嚟食，哥迪奥拿亦留有一手，奇云迪布尼同史达宁都放喺后备席，留待今场搏杀，曼城今场让一球可谓坐和望赢，乐比心水波胆係3比1，希望可齐齐过肥年。