今晚西甲爆加泰罗尼亚打吡，「1哥」巴塞隆拿作客基罗纳。巴塞日前西盃输波畀人插到晕，队长美斯抖够复出，必搵基罗纳发洩，随时一开波即揿住抢，1.7倍半场客胜有计。
（Now 632周日晚11时15分直播）
讲到巴塞近期最爆新闻，梗系争赢财雄势大嘅圣日耳门同曼城，签入阿积士当红炸子鸡法兰基迪庄。不过呢位荷兰新星下季先正式加盟，而近期借入加纳老将奇云保定，亦都够晒话题，佢喺上周中西盃8强首回合对西维尔担正，谂住畀美斯休息，点知巴塞最终淨吞两蛋坚肉酸，岩岩续约嘅主帅华尔维迪成为箭靶，今仗唔可以再甩辘。虽然前锋奥士文尼迪比利受伤，但有美斯复出领军，巴塞必求尽早攻陷对手冧番球迷。
近7仗联赛皆由头赢到尾
基罗纳上周中西盃8强首回合同样输波，作客2比4不敌皇马，连盃赛在内已经连续9场未赢过，上次赢波要数到去年12月头，睇得出近况极曳。撇除西盃，其实巴塞喺联赛相当稳定，唔单止近7场联赛赢晒，而且全部都喺上半场已经领先，由头赢到尾，岩岩西盃输波成肚火，今仗定必抢缰，半场客胜有买趁早。