周四凌晨英超前列分子车路士主场恶斗修咸顿。车仔领队沙利成功将夏萨特改造成入球机器，令佢入球能力大增，呢场对住后防穿晒窿嘅「圣人」修咸顿，仲唔一开波就抢攻？半场主胜唔好错过。
（Now 622周四凌晨3时45分直播）
事实证明，车仔新领队沙利系一位有性格有谂头嘅主帅，队中有基奥特同艾华路莫拉达两位正印前锋唔用，系要将以往打开进攻中场嘅「夏神」夏萨特强行改造，硬推呢位比利时攻击手做箭头人物，而事实证明沙利一意孤行系值得，夏萨特近4仗上阵就独取3球，脚风甚顺。而且车仔战术多变，上仗就靠防守中场尼高路简迪后上建功击败水晶宫，所以话对手想捉沙利条路绝对唔容易。
修咸顿换帅后场场失波
修咸顿喺中途接手嘅新帅夏辛侯迪带领下，无可否认表现系有起色，不过呢位前RB莱比锡教头一味挂住进攻，后防甩漏问题完全冇改善，佢接手5仗「圣人」场场有失波，包括上仗以1比3输畀曼城。况且两队近6次交手，车仔全胜之馀，其中4次上半场已经领先，一于再追半场主胜。