河床连征欧亚兵疲备战差
周三凌晨世冠盃准决赛，东道主艾阿恩将会迎战河床。河床虽然岩岩拎完南美自由盃威到尽，不过过程崎岖，肯定消耗唔少体力，加上南美球队近年出战世冠盃表现麻麻，今场作客中东有暗涌，河床让波之下，捧艾阿恩让球主胜好过。
（周三凌晨零时30分开赛）
阿根廷球队河床贵为自由盃新王，可以代表南美出战今届世冠盃，过程可以话一啲都唔容易，皆因早前嘅自由盃决赛次回合，因为球迷骚乱拖延多时，搞到满城风雨，最终要转场去到西班牙先有得同死敌小保加决一胜负，比赛仲要激战到加时，河床先以3比1成功反胜，两回合计赢5比3捧盃。呢次匆忙再赶嚟亚洲踢世冠盃，舟车劳顿肯定影响球员备战。况且近5届南美代表喺世冠盃准决赛法定时间内，只系取得1胜2和2负，优势实在无几，今次仲要让波实在捧唔落手。
东道主过两关士气好
相反，凭东道主身份获参赛资格嘅阿联酋球队艾阿恩，先喺资格赛落后3球劣势下连追3球，最终以互射12码淘汰FC威灵顿，之后再喺半准决赛以3比0轻取非洲代表艾斯柏兰斯，主场出击可谓愈战愈勇，而且球队有前日本国脚盐谷司，以及瑞典国脚马古斯贝治压阵，实力不容忽视，有力乘主场优势再创佳绩，让球主胜咪错过。