作客走样＋伤兵困扰
今晚深夜西甲榜首巴塞隆拿作客爱斯宾奴上演加泰罗尼亚打吡。巴塞近期够晒飘忽，近4场联赛作客只1胜，加上饱受伤兵问题困扰，对住近年主场出战打吡都有好表现嘅「爱奴」，2.5球细盘系投注首选。
（Now 632周日凌晨3时45分直播）
巴塞岩岩重夺榜首之位，但现时只系领先次席西维尔1分，同排第5嘅皇家马德里亦只得5分差距，优势绝对唔明显。「地上最强」未能抛离列强，主因系佢的今季联赛作客演出严重走样，近4仗作客只得1胜，对住榜下游嘅华伦西亚及雷加利斯都试过失分，加上今场续有沙治罗拔图、拉芬拿艾简达拿、乌姆迪迪及马尔甘因伤倦勤，加上箭头乌拉圭国脚苏亚雷斯右膝伤患情况好唔理想，目前只系定期用干细胞保守疗法拖住，明夏好可能要开刀根治，就算今仗勉强上阵，亦唔慌有好表现，所以都唔使点旨意佢。喺阵容不整下，相信巴塞隆拿目标只愿全取3分，唔会刻意强求大炒。
爱斯宾奴打吡够肉紧
唔计热身赛，爱斯宾奴近9次主场对巴塞虽只得1胜4和5负，但只有1次试过淨输3球，其馀8次全开2球或以下，当中近5次有4次半场踢成0比0，战情绝非一面倒；「爱奴」今季主场出色，7次主场出击获6胜1负，球员绝对有信心同「地上最强」周旋，死缠烂打下入波唔慌多，2.5球细盘值博。