今晚另一场世盃16强大战，由克罗地亚硬撼丹麦。「格仔兵团」喺今届世盃3战赢晒，不过锋芒过露，防守大过天嘅丹麦必有防范，前锋尤素夫保臣刑满复出，呢位防守型前锋可加强前场逼抢能力，况且丹麦一向稳阵行先，最锺意玩拉布，初段料会陷入拉锯局面，半场和值博。（Now 616及618台周一凌晨2时直播）

克罗地亚喺今届世盃D组3战赢晒，以首名出线，其中大炒劲旅阿根廷3比0，令人喜出望外，上仗正选阵容更收起9名主力，仍以2比1击败冰岛，证明呢班波有力与列强抗衡。不过「格仔兵团」坐拥莫迪历、拿杰迪锡、比列锡、文迪苏杰等多名老将，唔想场场都衝到咁行影响体力，通常喺初段刻意拖慢节奏，去到下半场先同你搏拳。

丹麦捱得打唔易失波

由于克罗地亚锋芒过露，丹麦必定会作出针对性部署，先巩固防守迎敌。丹麦喺今届世盃C组3仗，以1胜2和不败获次名出线，撇除尾轮分组赛对法国，喺双方打和就携手出线下互交白卷，首2仗斗秘鲁及澳洲，都系喺捱打情况下抢分成功，呢种死守打法系就系唔好睇，但3仗仅失1球，可见在门神卡斯柏舒米高镇守下，防线固若金汤。连同前锋尤素夫保臣坐完波监复出，佢同基斯甸艾历臣擅于喺前场做逼抢，能大大减轻防线压力。

论实力，克罗地亚必定更胜一筹，丹麦主帅夏利迪梗系唔会咁蠢同佢斗攻，为免先失波势陷于被动，初段实稳打稳扎，从今届世盃3仗全开半场和所见，佢的擅玩拉布，撞正留前斗后嘅「格仔兵团」，半场和值得再追。