世盃H组第2轮，波兰喺喀山球场硬撼哥伦比亚。两军首战齐齐输波，呢场为抢分肯定搏尽，不过波兰前锋罗拔利云度夫斯基上仗冇料到，加上队友唔争气，面对近期对亲欧洲球队都特别醒嘅哥伦比亚无力争胜，宁愿捧番哥伦比亚上盘好过。

（Now 616及618周一凌晨2时直播）

哥伦比亚首战1比2不敌日本，主要系因为中场山齐士摩兰奴，开波3分钟就喺自己禁区犯手球，累到哥军被罚食「全餐」，早段就踢少一个，兼输埋球12码，不过经过领队柏加文换人调整后，哥伦比亚就算踢少个，表现都唔失礼，仲一度靠祖安昆特路嘅入波扳平，最后虽然输波，球队整体演出依然值得讚赏。况且哥伦比亚面对欧洲波颇有心得，近7次对欧洲球队取得5胜2和，呢场吸取教训，应有所改善。

波兰态沉攻守都差

外围赛表现强势嘅波兰，未能将好状态带去俄罗斯，喺世盃分组赛首战就以1比2输畀塞内加尔，整体表现可以话系曳到爆。除左有后卫施安尼克自摆乌龙之外，基祖华克同门将施捷斯尼联手，仲齐齐合演低级失误，为对手送大礼失埋第2球，防线表现真系乱到一镬泡。

而最致命嘅，系波兰喺进攻方面都有阻滞，尤其球队组织速度缓慢，畀对手有时间从容布防之外，仲搞到王牌射手罗拔利云度夫斯基，经常陷入孤军作战嘅状态，冇办法完全发挥呢位德甲神射手嘅威力，加上波兰前场攻击板斧真系唔多，单调踢法好难威胁到哥伦比亚防线，哥军让平半必捧上盘。