今晚世盃头场上演G组次轮赛事，「欧洲红魔」比利时强战突尼西亚。比利时「新魔兽」卢卡古首仗大踢争气波省两粒，脚风顺到「冇朋友」，配合弗到震嘅夏萨特及奇云迪布尼支援，进攻水银泻地；突尼西亚冇分在手要焗攻，随时合演入球骚，2.5球嘅大盘有1.75倍值得捧场。

（Now 616及618周六晚8时直播）

比利时中前场粒粒皆星，有进攻发电机夏萨特及奇云迪布尼做支援，令前线嘅卢卡古及梅顿斯获得源源不绝供应，两人包办首仗轻取巴拿马3比0嘅全部入球，尤其系卢卡古头顶脚踢入两粒，一洗「卢渣古」污名，连热身赛在内，佢喺近10仗国际赛狂轰15球，平均每场达1.5球，相当惊人，证明佢季尾伤势已经好番晒。队长夏萨特上仗虽然食白果，但佢近15次为国家队披甲，入球连助攻合共炮製左16球，有「夏神」助阵唔愁冇波入。

突军冇分在手焗抢攻

非洲雄师突尼西亚首仗对英格兰表现唔曳，几乎可保住1分，可惜完场前抵挡唔到英军嘅角球攻势，最终输1比2坚唔抵。突尼西亚冇分在手，为争出线席位，今仗只有抢攻一途，不过首席门神穆斯哈辛上仗伤出，今仗继续倦勤，后备龙门法鲁克梅斯达化临危受命或影响防线。论牌面比利时无疑高啲，但中坚高柏尼继续养伤，另一后卫华美伦亦上阵成疑，可能改用保耶达，质素点都系差啲。翻查纪录「欧洲红魔」近4次对非洲球队，有3次开3球或以上，主胜得1.26倍冇肉食，斗攻局面下转玩大盘好过。