土豪对决烧钱遇挑机 英超第2轮尾场将会上演新旧「土豪」火併，今晚深夜曼城主场迎战「拖肥」爱华顿。客队近五次对曼城只输过一次，成绩绝唔失礼，对上一次仲喺主场大炒曼城4比0。呢场曼城虽然有中场根度简伤愈回归，不过要硬撼来者不善嘅加强版「拖肥」，哥迪奥拿班波坐镇主场都真系要打醒十二分精神，主队让2球实在太仁慈，让球客胜1.83倍值得追捧。 （Now 621及LeSports HK应用程式周二凌晨3时直播） 为备战今届英超，两队班主都开尽水喉，畀各自主帅任拣心头好，而两位主帅一于唔同老细客气使尽佢，喺转会窗一开就早早买入心水球员，而且一买就唔停手。曼城今夏喺转会市场暂时以2亿2千万英镑使费冠绝英超各师，而爱华顿亦以1亿3千万位列第3，两队都务求在英超各路豪强当中以财力杀出条血路。 一如既往，哥迪奥拿领军嘅曼城未开季就喺疯狂嘅「军备竞赛」中先拔头筹，首轮作客2比0轻胜升班球队白礼顿一战，虽然面对实力有限嘅对手，不过球队似乎岩岩开咧未完全入局，全场只有3脚射门中龙，两个入球其中一个仲系对方送大礼，嚟紧呢场面对实力不俗嘅对手，如果再老鼠拉龟，随时畀「拖肥」偷到鸡。 爱华顿新「冰刀」专劏曼城 曼城年年大使就好正路见怪不怪，反而「拖肥」今夏喺转会市场嘅掘起就够晒「吸睛」，近排佢的仲成功引入主帅朗奴高文追逐多时嘅「冰刀」基菲尔施古臣，呢位前热刺弃将有几劲？自3年前加盟史云斯以来，全队多达58个入球同佢有直接关系，「天鹅」上季最终护级成功都要靠佢，佢对上3次对曼城都唔系入波就助攻，简直就系能传善射嘅曼城剋星，呢场「冰刀」好有机会为「拖肥」初次上阵，有佢爱华顿想喺客场拿分不是梦。