岩岩睇完两场西班牙「国家打吡」嘅西甲迷，肯定急不及待想睇西甲正式开锣。唔使等喇，皆因周五深夜西甲即刻开骚，并且先后上演两场大战，头场戏码有两队上届护级生还者对战，由雷加利斯主场迎战艾拉维斯，两队近3次对碰都和波收场，呢场和局值得追多铺。 （Now 632周六凌晨2时15分直播） 作为西甲今夏最有话题性之一嘅转会消息，安素施丹加盟艾拉维斯认真够晒「吸睛」，呢位施丹囝囝无论场上位置同踢法都似足佢老窦，相信佢选择离开皇马唔靠父干，肯定喺想实践自己嘅抱负，今季安素施丹嘅表现绝对值得球迷期待。至于主队雷加利斯质素虽然普通，但上季主场成绩并唔失礼，对住实力唔算太强嘅艾拉维斯，预计可以顶得住；翻查两军近3次交锋，包括上星期进行嘅热身赛在内，全部和气收场，今场和波要得过。 华伦冇起色让波要反 同日尾场有没落豪门华伦西亚主场斗拉斯彭马斯；「蝙蝠军团」近年虽获新加坡班主支持，不过球队成绩依然冇起色，球员状态亦唔见特别标青，咁岩上季开咧首场又喺主场面对拉斯彭马斯呢支海岛劲旅嘅挑战，结果华伦惨败2比4。今场主队右闸马田蒙度亚有伤上阵成疑，拉斯彭马斯好有可能食过翻寻味作客偷鸡，受让之下有2倍嘅让球客胜咪走宝。 （Now 632周六凌晨4时15分直播）