缺巴神史奈达零球迷撑场 今晚继续上演欧联附加赛首回合，包括「意法大战」拿玻里主场对尼斯。想睇巴洛迪利、史奈达重返意大利比赛嘅球迷，今次应该会失望，因为尼斯教练法夫尔已讲明呢对「9+10」组合因伤及缺态，唔使预佢的，加上客军球迷被禁入场，令呢支法甲球队更势孤力弱。拿玻里瓮中捉鳖，力争赢到尽，奠定晋级基础，直取1.8倍让球主胜。 （有线61及201台周四凌晨2时45分直播） 拿玻里4人组火力超强 拿玻里上届欧联打入16强，仅被盟主皇马淘汰，经验及实力有保证，球队人脚变动少，中场灵魂咸锡加上「矮仔锋线」梅顿斯、荷西卡利祖、恩斯治尼夹惯夹熟，4人组上季意甲合共攻入72球，几乎系冠军祖云达斯全队总入球，非常夸张。虽然意甲仲未开锣，但以佢的嘅深厚默契，应该可以迅速上力，强攻尼斯，争取赢几多球，令对手次回合冇得翻身。 尼斯上季法甲表现一鸣惊人，但今季神话破灭，开咧后两场联赛全败，好大程度因为首席射手巴洛迪利喺7月尾欧联第3圈外围赛首回合对阿积士，勇战受伤，令球队顿失重心。虽然尼斯日前签入荷兰名将史奈达，但呢位33岁中场缺态，仲未踢得。尼斯拥有呢两位帮国际米兰捧2010年欧联冠军嘅球星，今场却得物无所用。 双方禁止对手球迷入场 值得一提，拿玻里趁机玩野，以避免发生球迷衝突为理由，禁止尼斯球迷买飞入场。虽然尼斯亦同样唔畀拿玻里球迷入场睇次回合，但已失先机。以尼斯近20场欧洲赛作客，只有1胜5和14负嘅劣绩，今场好难捱。