国家打吡稳阵行先 西甲虽然未开咧，但今晚西班牙超级盃率先爆发国家打吡！首回合先由盃赛冠军巴塞隆拿主场硬撼联赛盟主皇家马德里；巴塞今夏畀圣日耳门以天价撬走前锋尼马，依家打晒锣都未搵到「尼马替身」，火力削弱，不过死敌皇马日前先踢完欧洲超级盃未回气，王牌C朗又未弗，中场莫迪历仲要坐波监，预计初段会踢得小心谨慎，加上两军近年交手旺半场和，2.48倍半场和值得再追。 （周一凌晨4时开赛） 「地上最强」巴塞隆拿季前未必谂到，土豪圣日耳门真系会破纪录出价2.2亿欧元撬走旗下前锋尼马，搞到依家慌失失要渔翁撒网搵球员替补；嗰头斟利物浦嘅菲腊比古天奴，转头又话想签多蒙特嘅奥士文尼迪比利，不过搵嚟搵去仍然一个都未买到。大家都知道尼马嘅快放及突破，系近年巴塞破对方密集嘅利器，冇左呢位巴西球星都咪话唔伤，现时惟有用住今夏回巢嘅迪路菲奥、同埋签埋恒大嘅防中荷西保连奴顶档，但以两人级数根本难与尼马相提并论，火力难免缩水。 C朗未弗莫迪历停赛 另一边厢，皇马喺上周中欧超盃赢曼联2比1，西超盃匆匆再战「地上最强」，球员边有咁快回到气呀！相信皇马今仗会採取留前斗后踢法，最紧要稳阵。除此之外，王牌C朗归队冇耐，上仗欧超盃完场前后备上阵踢得几分钟，状态明显未弗，而中场主力莫迪历被翻旧帐于3年前西超盃领红被逐，由于皇马直到今年先至有得再踢西超盃，所以呢位克罗地亚球星要「找数」停赛，对皇马进攻组织影响咪话唔细，今场造访恐怖嘅鲁营球场更加唔敢轻举妄动。 查实两支西班牙班霸近年交锋表现，比赛初段都系稳阵行先，近4次碰头全部上半场握手言和，当中最重要数据系皇马近两次作客巴塞，上半场皆打成0比0。既然有绩可寻，今场大家斗谨慎之下，半场和不妨追多铺。