不擅争盾5战4败 社区盾今晚开波，意味英超新球季又展开，上届联赛冠军车路士将于温布莱球场硬撼上届足总盃冠军阿仙奴。车仔近年喺社区盾输多赢少，自温布莱重建后，5次参赛有4次败北，可见对呢个盃仔唔多重视，在缺少多名大将下让唔起「兵工厂」，乐比支持受让平半下盘。 （无綫数码频道J5周日晚9时直播） 转会窗仲有大半个月先关闭，相信两队人脚仲会有变动，尤其系车仔今季转会政策都系「一出一入」为主，中场以泰莫尔巴卡约高代替尼曼查马迪，后防泰利离队就补充番鲁迪格，前线艾华路莫拉达顶替打入冷宫，盛传即将离队嘅迪亚高哥斯达，暂时嚟睇只系勉强维持上季嘅水平，冇乜惊喜。 不过车仔今仗有大部分主力都唔出得，影响最大当然系夏萨特养伤，须知道佢同「迪哥」上季喺各项赛事包办左39个入球，失去两人对车仔攻力影响极大，最惨系连第三号射手，上季贡献左13个入球嘅柏度洛迪古斯都好可能因伤避战，前线单靠大后备巴舒亚伊及初来埗到嘅莫拉达攻坚，乐比真系唔多乐观，何况中场巴卡约高又系未ready。 阿仙奴酋长盃后已上力 当然，阿仙奴亦有韦舒亚、高基连同基比尔包列斯达倦勤，但相对影响真系唔大，唯一未知之数系「A山」踢完洲际盃迟归队兼之前病左，今场未必可上阵，但整体而言阿仙奴今场人脚都系喺车仔之上，新兵拿卡锡迪亦已经喺多场友赛亮相兼取得入球，似乎开始上力。 讲左咁耐两队人脚，好似同乐比以往预测球赛风格好唔同，问题系季初投注方向最重要就系斗人脚同状态，虽然车仔上月友赛曾以3比0大胜阿仙奴，但嗰阵两队开操冇耐，加上轮换加埋出左超过40人，战果参考意义唔大，反而阿仙奴经过上周酋长盃洗礼，明显已渐入佳境，今场受让咪走鸡。