记者日前去左ＦＣ东京官方专卖店EURO SPORTS逛逛，全店两层高，大部分卖ＦＣ东京嘅球衣同精品，讲到该队最好卖嘅波衫，梗系王牌大久保嘉人嘅13号战衣，不过队友高萩洋次郎都唔弱，其8号波衫、毛巾销情亦唔错，另外，着住8号战衣、每隻卖约1,300日圆（约91港元）嘅小熊仔，更被抢购一空，想买都买唔到。 期间球场职员率先向记者爆料，话ＦＣ东京喺8月将会推出新款太阳眼镜，仲即席搵来靓女店员八重客串做Model示范，呢款太阳眼镜除左以ＦＣ东京嘅红蓝两色为主色之外，佢个眼镜框外形，其实系用左「东京」两个汉字组成，坚有心思，每副只卖2,500日圆（约176港元），势必引起抢购热潮。至于靓女八重，原来喺此店做左4年兼职，今晚ＦＣ东京对新潟天鹅，佢都会喺球场卖野，入场睇波嘅粉丝随时见到佢。