港粉追星胜利船赢波 寻晚日职重头戏，神户胜利船喺主场御崎公园竞技场大战大宫松鼠，识睇梗系睇普多斯基啦，呢位重量级外援去到日职，首次落场即头顶脚踢攻入两球，带领胜利船赢3比1。今场唔止日本球迷，香港阿仙奴粉丝余先生亲身飞到当地追星，见住偶像咁Sharp醒，唔开心就假啦！ 昨日神户气温达摄氏29度，上半场约600名松鼠球迷坐喺客队龙门后面，虽然不断唱歌打气，但声势远逊另一边龙门后嘅主队球迷，佢的大声高唱有「Poldi」暱称嘅歌助兴，热情澎湃。 带动气氛 攻守都掂 作为胜利船今夏最重量级收购，普多斯基喺呢场个人日职首骚梗系担正，拍住队长渡边千真攻坚，不过上半场佢表现一般，仲因同对方喺禁区内发生小小碰撞，被球证吹罚兼松鼠球迷狂嘘。完半场前，胜利船喺约25码博到罚球，绝对系普多斯基食胡位，可惜佢射中人牆弹出底线。 易边后，普多斯基即刻嚟料，49分钟佢喺右边禁区外扣番大位，起「黄金左脚」狂抽破网破僵局，首度日职亮相即开斋，全场掌声雷动。虽然60分钟松鼠前锋马些路杜斯卡奴追平，但普多斯基又做救世主，2分钟后喺小禁区头槌顶成2比1，佢入波后即鼓动面前嘅粉丝打气，气氛进一步飙升。 以往畀人批评懒散嘅普多斯基喺前场逼抢，逼到对方无法推进只获界外球，又入波又勤力防守，抵讚！之后因对方喺禁区犯手球，但球证冇判12码，激到「王子」同球证嘈左几句兼拍手，非常肉紧。78分钟，胜利船再由田中英雄远射锁定胜局成3比1，普多斯基嘅日职首骚就省2粒，协助胜利船赢波，坚系福将。 「答应港媒继续努力」 今仗因普多斯基首骚而备受瞩目，来自香港嘅余先生，以往经常飞到日本睇日职，本来同爸爸去睇大坂打吡，但因为佢系阿仙奴球迷，所以梗系睇呢场支持前「厂仔」普多斯基，每张飞使左约200港元。 首骚即梅开二度，胜利船福将普多斯基难掩兴奋之情，赛后佢受访时话：「我很高兴可以喺处子战省2粒，协助胜利船赢3比1。自己未100%融入球队，但感觉状态正在冒升，渐渐适应呢度嘅环境。」佢再补充：「我觉得神户比赛气氛好好，好多家庭会一同入场。」之后普多斯基走出通道，成功畀我的一班香港传媒捕获，佢话：「自己入2球兼助球队赢波，真系好开心，我会继续努力。」