欧洲超级盃前哨战 国冠盃周一凌晨继续有重量级戏码上演，西甲皇家马德里喺美国加州火併英超曼联。双方3年前喺国冠盃交手，创下美国本土足球比赛最高入场人数纪录，受瞩目程度可想而知，今仗亦系下月举行嘅欧洲超级盃前哨战，为攞头彩预计唔会放软手脚。连同上次斗「红魔」，皇马近4仗国冠盃斗英超球队全开4球或以上，捧3.5球大盘。 （Now 633周一清晨5时直播） 皇马同曼联可以话系全球最受欢迎2大球会，加上阵中粒粒皆星，每次碰头都分外瞩目。2014年夏天双方曾喺国冠盃交手，结果吸引109,000名观众入场，虽然今次个圣塔克拉拉李维斯球场嘅容量，远远唔及当年嘅密芝根球场，但两军下月8日会喺马其顿角逐今届欧洲超级盃，作为前哨战今仗当然唔想失威，战意、斗志毋须怀疑。 「银河舰队」今夏放走中坚比比及中场占士洛迪古斯，前锋艾华路莫拉达亦落实转投车路士，新加盟嘅丹尼施巴路斯、迪奥靴南迪斯，以及回收嘅捷西斯华利祖暂时被视为长远栽培对象，现阶段仍以上季班底为主。王牌基斯坦奴朗拿度仲放紧假，今仗唔会倒戈，不过仍有加里夫巴利、宾施马、却奥斯、莫迪历同艾斯高等好手在阵，战斗力有保证。 皇马近4战英超军全大盘 曼联喺美国已先后同洛杉矶银河、皇家盐湖城同曼城交手，新兵卢卡古更已连续2仗有波入。虽然今仗只系皇马喺美国首仗正式热身赛，但其实皇马抵达美国已经超过1星期，适应方面唔成问题，客观条件上同曼联拉成均势。皇马对上4年喺国冠盃曾经5度同英超球队交手，近4仗全部总入球皆喺4球或以上，今仗宜向入球大埋手。