海军斗水兵放硬闷蛋 女子欧国盃D组赛事周一凌晨上演次轮大战，由苏格兰女足同葡萄牙女足两支0分球队对碰，讲真两队喺首仗都输得几「肉酸」，实力明显唔及同组另外2个对手。苏格兰女足本来高葡萄牙女足半线，但首席前锋珍妮露丝又打柴，两队都冇乜争胜板斧，今仗好可能闷战一场，入球细抵玩。 （有线61台及奇妙电视77台周日凌晨零时直播） 苏格兰女足上仗面对劲旅英格兰女足，最终惨吞6蛋，事实上两军级数有明显分野，大败亦都不足为奇，最惨系球队王牌射手珍妮露丝上仗膊头受伤，据讲今场会先挂免战牌，留待尾轮对西班牙先搏杀，冇左呢位外围赛入10球、曾经107次为国家队上阵嘅星级箭头，想入波有难度。 葡萄牙女足上仗亦以0比2输畀西班牙女足，单睇战果好似唔系太样衰，但事实上葡军冇一脚射门能够命中龙门，而且全场只系得21%控球率，可以话系毫无还击之力。葡萄牙女足过去5次对苏格兰女足只系赢过1次，今仗睇怕都系斋守冇得攻。 英格兰西班牙开惯「大」骚 同组另一场英格兰女足对西班牙女足，两队同样3分在手，由于两队实力系小组内最强，普遍认为出线唔成问题，今仗会系争夺首名之战，好大机会系开放式进攻足球。英格兰女足上年10月赢过西班牙女足2比1，但2013年欧国盃就输过畀「狂牛」2比3，场场都咁激，今仗追入球大好路。