唔赢即炒主帅柏度域 周日黄昏波有日职独脚戏，由浦和红钻主场迎战包尾大幡新潟天鹅。红钻上周中补赛惨败，盛传主帅柏度域今仗赢唔到即炒鱿，以射手兴梠慎三为首嘅锋线火力强劲，不过主力守将远藤航今仗要坐波监，防线存隐忧，随时以攻代守，斯维觉得转捧有2.05倍、中位数3.5球嘅大盘更划算。 （有线64台周日下午5时30分直播） 兴梠慎三主场火力猛 红钻上季临尾香屈居总亚军，虽然今季成功杀入亚冠8强，但于联赛表现飘忽，上周中补赛作客更以1比4大败畀川崎前锋，依家只位列中游，赛后有球迷嬲到堵塞红钻嘅队巴，主帅柏度域焗住同粉丝直接对话，拍晒心口话会赢联赛同亚冠盃锦标，讲到咁尽一定唔会揸流摊，何况外边一直传紧佢连天鹅都赢唔到嘅话，即刻要执包袱。事实上，以兴梠慎三、武藤雄树、拿费尔达施华组成嘅锋线火力强劲，现以12球位列射手榜1哥嘅兴梠慎三，有10球系喺主场取得，难怪红钻今季8仗联赛主场轰入26球，成为主场入波最多嘅球队，即使李忠成跛左都唔惊。 红钻守将远藤航停赛 另一边厢，新潟天鹅今季战绩差强人意，唔单止排紧包尾，单计9仗联赛作客输左6仗，兼且失左18粒，造访火力强劲嘅红钻好难全身而退。不过红钻过于着重进攻，令后防漏洞百出踢左17仗联赛就狂失29球，上仗惨败畀川崎前锋，仲有主力守将远藤航做埋「红牌阿姑」，今仗要坐波监，但柏度域为保帅位已无退路，随时以攻代守炮轰天鹅，预计会劲多波入，主胜得1.23倍冇肉食，倒不如转玩3.5球嘅大盘。