经验Vs速度争霸战 洲际国家盃今晚上演王者战，智利同德国喺俄罗斯圣彼德斯堡决战。唔好谂住决赛双方踢法会保守，德军近期攻强守弱，希望用本身强项争盃；智利平均年龄偏大，连战兵疲亦唔想踢加时，两军都有抢攻理由。何况洲际国家盃唔同世盃或欧洲、美洲国家盃呢啲大赛，球队心态轻鬆得多，历届决赛入球数字都偏高，大细中位数2.5球嘅大盘，有2.02倍值得推介！ （LeSports HK应用程式周一凌晨2时直播） 智利倚重「A山」搵食 决赛双雄喺分组赛时已经交过手，当时1比1未分高下。今场系经验同速度嘅对决，平均年龄达29岁嘅智利，主力中后场维达尔、马些路戴亚斯、柏度靴南迪斯、干沙路查拉同包尔斯亚都年过30，经过4强同葡萄牙激战120分钟后，能否及时回气系一大关键，今场自然唔希望要再次加时苦战，预期会倚重由「A山」阿历斯山齐士领军嘅锋线，务求法定时间内争取入波砌低「日耳曼兵团」。 德国今次派出大量年轻球员应战，分组赛表现麻麻，直至4强遇上墨西哥至踢出精彩一仗，攻击手史甸度、迪姆华拿同哥列斯卡轮流爆发，前线火力全开，不过防线依然畀唔到人信心，上仗墨西哥前线对德国製造到嘅麻烦绝对唔少。 德军防线欠稳易失波 德军近期重攻轻守，睇番近7仗国际赛虽然有5胜2和唔曳成绩，但当中只有对超级鱼腩圣马力诺一仗可保清白之身，其馀比赛都有失波，即使弱旅如阿塞拜疆、丹麦同澳洲，都可以喺德军身上取得入球，今场再战智利相信亦难保不失。睇番过去9届洲际国家盃，有6届决赛总入球达3球或以上，包括近3届巴西3连冠，呢项赛事决赛向来唔保守，黑柴撑大盘。