剋星根斯算死英格兰 今晚假波兰举行嘅U21欧洲国家盃爆发2仗4强大战，重头戏梗系头场嘅「英德」宿敌对决，由英格兰U21火併德国U21。德国U21虽然演出唔及「幼狮」咁sharp醒，但主帅根斯喺球员时代剋住「三狮兵团」，加上佢嘅执教风格坚注重防守，今仗仲要系1场定生死嘅淘汰赛，一定踢得小心翼翼，唔慌多波入，捧1.74倍细盘稳阵。 （周三凌晨零时开赛） 德国U21主帅根斯名气唔算响，但做球员嗰阵曾协助「日耳曼兵团」夺得1996年欧国盃，当年呢位前锋只系队长奇连士文身边嘅「绿叶」，25次代表德军入得6粒唔多起眼，佢成世仔嘅代表作，就系当年欧国盃4强战面对英格兰。此役连「奇哥」都因伤缺阵，比亚荷夫又未一炮而红，根斯临危受命担大旗，佢唔单止喺法定时间建奇功追成1比1，并喺互射12码操刀中的，喺「足球圣殿」温布莱球场淘汰呢支东道主，明显剋住「三狮兵团」。 事隔21年，同样喺4强阶段，根斯今次改以德国U21主帅身份，在U21欧国盃遭逢「幼狮」，更加不敢怠慢。好似德军上仗喺只输1球亦可晋级嘅情况之下，最终以0比1不敌意大利U21，话就话强阵出击，但麦斯美亚、基拿比等主力喺嗰仗踢到勒住勒住咁，似乎系为4强战留力，睇得出根斯机关算尽。 英军锋芒太露易被睇通 另一边厢，英格兰U21于分组赛录得2胜1和未输过，但初段锋芒太露有时未必系好事，反而令德国U21更有戒心。何况4强系1场定生死，以根斯咁稳阵至上嘅风格，今仗必定先做好防守，连U21欧国盃及「拍跳」在内，德国U21近7仗虽录得4胜3负唔多突出，但只失3球，防线顶得两嘴，当中有6仗总入球只达2球或以下，「幼狮」要攻陷其城池亦非易事，转捧入球细好过。