澳洲焗攻易出事 另1场洲际盃B组煞科战，由智利迎击「袋鼠兵团」澳洲。现时高踞榜首嘅智利今场和波都够出线，但话晒实力高澳洲一班，况且佢的亦要力争小组首名，相信唔会咁衰仔只求1分。至于澳洲必须赢波先至有机会出线，唯有焗攻放手一搏，但「袋鼠兵团」防线脆弱，主攻更加容易失守，睇怕半场都顶唔住。主Ｗ嫌冇肉食，不如转玩智利1.72倍半场主胜。 （LeSports HK应用程式周日晚11时直播） Ａ山显「快枪手」本色 智利上仗派番射手阿历斯山齐士出任正选斗强敌德国，呢位阿仙奴主将尽显「快枪手」威力，开波6分钟就取得入波，更超越名宿沙拉斯，成为智利国家队史上入波最多嘅球员。强如德国防线都阻唔到「A山」闪电入波，澳洲条「豆腐防线」就更加危危乎。 澳洲踢左两场分组赛暂只得1分，首仗对德国5分钟就失波，上轮遇上喀麦隆同样顶唔住半场，全靠下半场博到12码，先至逼和对手。睇番澳洲近3仗比赛得1和2负，仲要全部都系上半场落后，加上近4次对智利全败收场，最近1次系2014年世盃分组赛，澳洲半场落后1比2，全场输1比3，智利半场Ｗ分头唔错，值得再追。