勒夫试阵遇冇牙狮子 喺俄罗斯举行嘅洲际国家盃B组今晚上演最后一轮，德国会喺索契出战榜尾嘅喀麦隆，目前呢组4队都有出线机会，但今仗两军都唔将呢个赛事嘅胜负放喺第一位，大家都系为世盃做准备。德军领队勒夫锺意喺最后1轮分组赛试新人，喀麦隆前线哑火变「冇牙狮子」，黑柴推介2.1倍嘅中位数2.5/3球细盘。 （LeSports HK应用程式周日晚11时直播） 德国「B队」暂时以4分排小组次席，不过呢班攞紧经验嘅二线兵演出只系一般，首轮对澳洲唔识留放，上半场搏完后，下半场好早就乾；次仗对智利就相反，上半场捱打错漏甚多，到下半场至愈踢愈稳。当然球队亦有得着，中场新星哥列斯卡同前线28岁新丁史甸度成功跑出，相信已经Book到明年俄罗斯世盃决赛周嘅一席位。 日耳曼新兵登场要适应 德军今次志在试兵，过去两场先后用过两位门将表现麻麻，今晚预期会畀机会巴黎圣日耳门嘅奇云查普试试，其馀未上过阵嘅「日耳曼」小将包括守将柏顿赫特、轩历治斯及中场迪米亚巴尔等都有机落场，相信要时间适应，况且今场和波都出到线，冇需要急攻，睇定嚟食都唔迟。 喀麦隆由比利时65岁老帅晓高布斯领军，佢讲明喺世盃外围赛追赶尼日利亚先至紧要，今次参战洲际盃练兵为主，但头两轮赛事用死11名正选，就算换人都拖到完场前，明显想畀班球员培养默契。喀麦隆头两场演出守优于攻，由西维尔门将奥度亚领军嘅防线尚算硬淨，但前线主力阿布巴卡就明显缺态，两仗零入球之外仲浪费大量机会，不过呢位比锡达斯射手被誉为「国家英雄」，估计晓高布斯都会继续畀机会佢，只系今仗面对世盃冠军，阿布巴卡想开斋难度更高，今场投注首选细盘。