新丁争上位强攻智利 今晚于俄罗斯喀山进行嘅洲际国家盃B组次轮爆发重头戏，由德国火併智利。虽然今次「日耳曼兵团」用劲多新丁，不过呢班生牯仔有前冇后、打死罢就，个个心口挂个勇字向前衝，但后防甩漏多多，撞正火力唔弱嘅智利随时合演入球骚，捧1.59倍大盘（2.5球）最划算。 （LeSports HK应用程式周五凌晨2时直播） 日耳曼防线牙烟 贵为上届世盃盟主，德国今次出征洲际盃起用大批经验欠缺嘅新丁，主帅勒夫想班主力喺今夏获得休息之馀，亦可藉洲际盃训练新人，为德国披甲31次嘅中场达斯拿已经系出赛次数最多球员，就知呢班波几咁嫩口。从德国首轮赢澳洲3比2之役，睇得出呢班新丁为左博上位，个个都坚抢缰，好似绰号「新波历克」嘅哥列斯卡更获《图片报》点名称讚。喺勒夫鼓励之下，球员冇心理包袱大踢进攻足球，自然多波入。相比之下，德国喺后防线就有唔少「炸弹」，先系门神宾特尼奴上仗两番「派胶」接连失波，甚至畀媒体用「尼奴的礼物」为题耻笑佢，而中坚鲁迪格一向都好牙烟，既然咁唔稳阵，勒夫索性以攻代守唔系冇原因。 A山维达尔反击煞食 智利连续两届夺得美洲盃，并有阿历斯山齐士（A山）及维达尔等王牌压阵，经验远胜德国，就算赛前传出A山有伤，但预计呢位斗心王应无恙可披甲，佢的向来踢反击最煞食，遇上后防不稳嘅德军实搵到着数。依家两军同得3分喺B组领放，智利暂以较佳得失球做「1哥」，而且尾轮只系出战实力最弱嘅澳洲，智利只要今仗唔输畀德国，争首名出线嘅机会都几乐观，难得「日耳曼兵团」防线甩皮甩骨，益晒智利打反击，一于捧大盘。