防线残缺以攻代守 U21欧国盃C组首战，出线热门德国扑击同组牌面最弱嘅捷克，不过今场主W得1.54倍稍嫌过热，毕竟德国小虎队人脚唔齐，加上两军熟晒路，近3次对碰都系和波收场，考虑到今仗喺波兰上演，德国、捷克同波兰喺地理上系紧贴嘅铁三角，两军都唔使舟车劳顿同适应气候，相信会更快入局，双方目前阵容同样攻强守弱，投注首选1.72倍嘅中位数2.5球大盘。 （周一凌晨零时开赛） 德国U21今次有多名主力缺阵，包括常规主力史浩克04门将韦伦雷特、多蒙特守将马菲亚斯真达、刚由贺芬咸转投拜仁慕尼黑嘅中坚历卡斯苏尼，佢的一直系U21防线铁三角，另外已晋升大国脚嘅利华古逊中坚庄拿芬泰希赛前因伤退队，前场亦冇左曼城利莱辛尼同RB莱比锡嘅迪姆华拿，当中损失最大肯定系后防。不过，德军仲有两位天才前锋，分别系刚由莱比锡转投哈化柏林嘅戴菲沙尔基同刚由云达不来梅转投拜仁嘅基拿比，中场亦有队长禾夫斯堡嘅麦斯美艾洛特、史浩克发电机麦斯美亚同缅恩斯主力奥斯杜拿尼后上支援，中前场人脚依然可观，有条件以攻代守。 捷克射手柏德列舒希克爆红 捷克U21除左喺2011年攞过殿军，近年成绩麻麻，但近期爆出超级射手柏德列舒希克，呢位21岁新星过去一季为森多利亚取得11个意甲入球，据报祖云达斯已为佢开出3,050万欧元巨额转会费撬人，佢至今已为捷克U21入左8球。捷克U21整体实力唔算强，但喺老帅拉域斯卡带领下崇尚进攻，近10场国际赛有9场总入球达3球或以上，今次强阵遇上防线不整嘅德军有力入波，大盘可取。