地狱式特训迎大不列颠打吡 世界盃欧洲区外围赛爆发「大不列颠打吡」，喺F组排榜首嘅英格兰今晚作客苏格兰，呢两支兄弟兵近年发展方向好唔同，英格兰喺修夫基领导下大力年轻化，目前小组5战不败排榜首证明成效唔错，相反苏格兰人才凋零，继续食老本搵过气球星撑场，今仗难挡哈利卡尼等当红球星进袭，英格兰客W好路！ （有线61、64、201及203台周日凌晨零时直播） 修夫基上年中途接手英格兰后，呢位前U21教头循序渐进推行改革，逐步安排哈利卡尼、迪利阿里、史达宁等新星担正，今次更大胆放弃喺曼联长居后备嘅队长朗尼，改朝换代接近完成。修夫基赛前特别拉队参加英国皇家海军陆战队训练，长达48小时嘅地狱式特训，磨练众将嘅体能及斗心，争胜决心相当之大。 格食格恰惯苏格兰老兵 英格兰赛前虽然有占美华迪受伤退队，不过球队锋线人材济济，尤其系连续2季获英超金靴嘅哈利卡尼，佢喺联赛最后3仗狂轰8球，状态弗爆，配合埋拉舒福特等新星，活力十足。唔好忘记，英格兰近3次同苏格兰交锋录得全胜佳绩，3仗均轰入对手3球，明显格食格，预计「三狮兵团」喺今场打吡可轻鬆取胜。 另边厢，近年足运发展停滞不前嘅苏格兰，依家喺F组只排第4，落后榜首英格兰6分，其阵容以英超二线兵、英冠球员同苏超球员为骨干，一直食老本，连上年宣布左退出国家队嘅史葛布朗都被游说复出，其馀主力仍然系赖史密夫、费查、占士摩利臣等老将，睇怕好难扭转畀英格兰食住嘅宿命。