迪甘斯前线兵器选择多 今晚世界盃外围赛欧洲区A组爆发榜首大战，由「2哥」瑞典主场硬撼「1哥」法国。法国人才鼎盛，特别係中前场劲多兵器，多到令主帅迪甘斯都唔知拣边个先係最好，而箭头基奥特喺啱啱嘅热身赛更成为「高卢鸡」17年来首位「戴帽」球员，脚风奇顺，挟着近4仗外围赛赢晒嘅气势，造访今非昔比嘅瑞典冇有怕，客胜有计。 （有线61及201台周六凌晨2时45分直播） 法国上年嘅自己地头主办嘅欧国盃只能屈居亚军，不过主帅迪甘斯打造一支攻守兼备嘅「高卢鸡」逐渐成型，特别係中前场人才辈出，除咗基沙文係必然正选之外，迪帅可按照唔同需要，起用基奥特、皮耶、奥士文尼迪比利、拿卡锡迪或「新亨利」基利安麦巴比等唔同类型嘅兵器，拍住基沙文，咁多人拣真係羡慕死人。 基奥特17年来首位戴帽 正所谓有竞争先有进步，呢班前锋为咗争取主力必定搏老命，好似成日畀人闹係失机王嘅基奥特，喺上周热身赛法国大胜巴拉圭5比0之役大演帽子戏法，令佢成为继2000年查斯古特之后，17年来首位为「高卢鸡」连中三元嘅球员，连同上季季尾不断为阿仙奴助攻及士哥，「基佬」明显弗番晒，面对拿卡锡迪、基利安麦巴比等后浪嘅冲击，「基佬」係时候要加把劲先可保住正选中锋位。 另一边厢，瑞典自「神锋」伊巴谦莫域喺上年欧国盃后退出国家队，锋线始终冇1位可以孭到飞嘅球员，况且近4次对法国输咗3场，明显畀「高卢鸡」食住，就算今仗有地利之助都冇用。加上法国喺近4仗世盃外全部赢晒，气势如虹，如果今仗直接交锋赢波，便可甩开瑞典6分，对巩固首名大有帮助，一于捧客胜。