今日全球焦点肯定落喺深夜举行嘅欧联决赛，不过呢场大战未开波前，下午仲有唔少日乙几好路，其中榜首名古屋鲸鱼会喺丰田市丰田球场迎战金泽萨维根，论实力及近况，联赛3连胜嘅名古屋鲸鱼无疑远胜两连败嘅金泽萨维根，不过鲸鱼对上4仗加埋失咗7球，而且鲸鱼亦係目前排名前10球队之中，失球数字最多球队之一，遇上防线同样不设防嘅金泽萨维根，改捧大盘较上算。 （周六下午1时开赛） 名古屋鲸鱼今季由日职降班，前线虽放走咗日本国脚永井谦佑，但成功留住上季联赛首席射手瑞典外援施莫域，另外购入上季帮长崎成功丸射入17个联赛入球嘅永井龙，再由广岛三箭及大坂樱花罗致2大老将佐藤寿人及玉田圭司，以此攻击班底足以在日乙横行，不过以上收购主要集中喺前线，令到佢哋出现「头重脚轻」问题。鲸鱼今季16仗联赛失咗20球，同排第5嘅长崎成功丸係目前头10名球队之中、失球数字均达2字头嘅球队，防守唔算稳阵。金泽萨维根连续9仗联赛有失波，其中最近2场对福冈黄蜂及松本山雅更分别以0比5及0比4大比数落败，既然两军后防都咁曳，预计今场会有唔少入波出现，捧大最稳阵。 福冈黄蜂让得起讚岐 另外两场比赛，「2哥」福冈黄蜂主场对讚岐卡马达马尼。黄蜂上场对群马草津温泉意外输波，榜首位置更被鲸鱼抢走，今次再喺主场迎战另一支下游队伍讚岐卡马达马尼不容再失。讚岐卡马达马尼今季16仗联赛只得1胜，单计作客成绩更係排包尾，8场作客只得2和6负，黄蜂让半一捧上盘。（周六中午12时开赛） 湘南迎长崎吼半场和 最后一场排第3嘅湘南比马主场斗长崎成功丸。湘南比马今季联赛仅入19球，攻力一般，好彩佢防守好，特别比赛初段集中力极高，近7仗联赛有6仗上半场冇失波，其中近5仗4次开出半场和，值得再追。 （周六下午3时开赛、马会网上文字直播）