主场专破中超兵 今晚续有亚冠盃16强次回合，日职劲旅鹿岛鹿角要绝地反击，返主场再斗中超班霸FC广州。鹿角首回合以输0比1，为咗晋级今仗许胜不许和，战意唔使怀疑，除咗伤兵陆续康复及上周末联赛获免役之外，鹿角近年每逢喺亚冠盃主场出击例剋中超球队，今仗再喺福地迎战信心爆晒棚，主胜有买趁早。 （Now 672及Fox Sports Play周二晚6时直播） 鹿岛鹿角喺首回合作客畀巴西国脚荷西保连奴一箭定江山，以0比1输畀FC广州，最弊係攞唔到作客入球，意味着今仗一定要赢波先有出线希望，如果赢1比0就要打加时，假如喺唔失球之下淨胜2粒或以上即晋级，所以佢哋已经无路可退，必定要丧攻求存。鹿角赛前收到喜讯，首回合倦勤嘅守将西大伍及植田直通今仗可赶及伤愈复出，而且日本足总亦好识做，为有份参加亚冠盃嘅日职球队调整联赛赛期，原本上周末联赛鹿角要出战大坂飞脚，亦获得延至7月先打番，令鹿角有更多休息时间，以逸待劳备战今仗。 FC广州打完硬仗输体力 相反，FC广州就冇呢啲咁好嘅待遇，上周五喺中超赢FC重庆2比0之役，虽然有收起部分主力，但巴西球员列卡度高拉特及阿伦卡华路亦分别以正选或后备上阵，体能点都输蚀畀鹿角。加上鹿角近5次亚冠盃主场迎战中超球队赢晒，包括前年4月喺分组赛以2比1击败FC广州，信心十足无惧呢支中超班霸来犯，主胜好路。