争前4甩拖抢盃挽面子 今晚翡翠台直播嘅英格兰足总盃决赛爆发伦敦打吡，由历史性第20度杀入决赛嘅阿仙奴喺温布莱球场，硬撼今季英超盟主兼死对头车路士。阿仙奴连「争4狂魔」嘅金漆招牌都被打烂，如果足总盃都攞唔到就真係四大皆空，何况老帅云格係「足总盃专家」，近7次带领阿仙奴入决赛6次捧盃，为咗光荣留任兼帮「兵工厂」荣膺足总盃之王，面对死敌车仔一定搏甩髀，仲有得受让咁笋，必捧2.05倍让球主胜。 (无綫翡翠台周日凌晨零时30分直播) 虽然车仔自变阵343后喺联赛放到甩辘，阵中亦冇伤冇病，主帅干地都想继2009-10年度球季意大利同胞安察洛堤之后，成为另一位首季执教车仔即荣膺联赛及足总盃双冠嘅领队，不过同市打吡一向打甩髀，仇人见面分外眼红，好难单纯以实力定高低，今季车仔2斗阿仙奴只得1胜1负，有办你睇，而且一场过嘅决赛有好多变数，唔好盲目睇好车仔。 阿仙奴一向係「争4狂魔」，但今季联赛最终只列第5位，唔单止係老帅云格自1996-97年度球季上任后首度跌出前4，亦係20年来首次未能取得欧联入场券，「争4狂魔」终被拆招牌。虽然季尾约满嘅云格好大机会续约，但连以往都将前4当冠军嘅藉口都冇埋，佢老人家如果想风风光光咁留任，避免落得四大皆空下场，足总盃就成为阿仙奴今季捧盃嘅最后机会。 学车路士打343有起色 查实不嬲顽固嘅云格都识得变通，临近季尾突然弃用多年嘅4人防线阵式，竟「跟风」变阵343，令阿仙奴喺季尾大有起色，喺各项赛事于法定时间内豪取7胜1和1负佳绩，包括于足总盃4强加时以2比1淘汰劲旅曼城，同车仔嘅343交锋一啲都唔输蚀，尤其王牌阿历斯山齐士近4仗狂轰5球，佢同阿历士张伯伦伤势无碍可赶及复出，对伤兵唔少兼哥斯尼停赛嘅阿仙奴嚟讲係天大喜讯。 温布莱係云格福地 况且云格同足总盃分外有缘，佢之前7次带领阿仙奴跻身决赛，有6次喺法定时间保持不败兼最终成功封王，不败率高达85.7%，包括3次喺改建前及改建后嘅温布莱球场比赛全部捧盃，「足球圣殿」简直係云格福地。阿仙奴若果今仗击败车仔，就係佢哋第13次捧足总盃，成为捧足总盃次数最多球队，为争做足总盃之王一定搏到尽，咁都受让必捧让球主胜。