出战「保皇党」马拉加睇定食 西甲争持激烈，来到今晚煞科战先至可以决出冠军谁属，榜首皇家马德里形势大好，今仗作客马拉加，和波就够捧盃。近日更爆出「利益输送」疑云，盛传马拉加会长阿尔塔尼同教练米高都係「保皇党」，想「放水」畀皇马。「银河舰队」自然好定档，可以睇定嚟食，冇必要大炒「好朋友」，客W1.12倍冇肉食，宁博中位数3.5球、2.35倍嘅入球细。 （Now 632及Viu TV 99周一凌晨2时直播） 皇马上周中补赛赢切尔达4比1后，领先次席巴塞隆拿3分，由于皇马对赛成绩较差，今场要攞多1分，先至可以正式封王。好彩煞科战遇上「贵人」，因为马拉加教练米高係皇马名宿，佢早前自爆话，好热爱皇马，会长阿尔塔尼更加声称，唔会畀加泰人（巴塞隆拿）夺冠，保「皇」保到出晒面。原来马拉加2013年卖艾斯高去皇马，合约中订明，皇马5年内夺得联赛冠军，马拉加可以多得100万欧元（约870万港元）进帐，难怪阿尔塔尼变成「皇粉」。 马拉加教练係皇马名宿 既然马拉加係「自己人」，皇马就唔需要太肉紧，更加唔会「恩将仇报」大炒呢队「盟友」。其实皇马和波都可以捧盃，最紧要稳稳阵阵，有分落袋就完成任务。更何况皇马两星期后，就要同祖云达斯踢欧联决赛，教练施丹应该会锡住班主力，点到即止，避免无谓受伤。 至于马拉加冇嘢好争，唔介意送分畀皇马，但唔代表会大败，以免招人话柄，话佢哋真係「放水」。事实上，马拉加踢法硬淨，今季两斗巴塞，分别打和0比0及赢2比0，首循环作客皇马，亦仅负1比2。翻查马拉加近7次对皇马，有6次总入球係3球或以下，中位数3.5球嘅入球细值博。