15岁「美斯」踢到晓非 世青盃今日上演C、D两组共4场分组赛，重头戏首推D组南非U20斗日本U20。日本今次大军有唔少现役日职球员在阵，加上仲有绰号「日本美斯」嘅15岁神童久保建英充当秘密武器，有力击败质素平庸嘅南非响头炮，日本小让平半捧上盘。 （LeSports HK 应用程式周日下午4时直播） D组除咗今场两支主角日本及南非，仲有应届U20南美冠军乌拉圭及U19欧国盃亚军意大利，以实力及经验计，乌拉圭及意大利都喺日本、南非之上，所以对今场对赛双方嚟讲，如果想争出线，今仗须全力求3分。日本今次点兵主要以去年赢得U19亚洲盃冠军班底为主，包括喺亚洲盃攞到MVP、现效力大坂飞脚嘅中场发电机堂安律及其球会队友初濑亮，上述两人喺今季日职都有唔少上阵机会，实力获得肯定。 南非前锋主力缺阵 前线则主要由磐田山叶嘅小川光树伙拍京都不死鸟嘅岩崎悠人争取入波，不得不提仲有曾经效力巴塞隆拿青年军嘅久保建英，呢名15岁神童喺巴塞时期已受到广泛关注，由于盘扭技术高超，被称为「日本美斯」，佢喺上季重返祖国加盟FC东京U18，一直有踢J3赛事，今季曾代表一队喺日联盃对北海道札幌冈萨多后备上阵，今次能够「越级」代表U20出战，实力唔需要怀疑，话唔定会成为日本争胜嘅秘密武器。 南非于年初举行嘅U20非国盃赛事仅得第4名，实力本已唔突出，而且赛前仲有前线主力之一嘅马林比因伤退队，战斗力更打折扣。虽然佢哋阵中有3名球员喺葡萄牙搵食，不过主要都係参与青年军赛事居多，斤両唔多够秤，何况今届赛事喺南韩举行，日本唔使舟车劳顿等同有半个主场之利，南非失地利更难言恶，日本今仗小让平半，上盘值博。 乌拉圭唔赦意大利 同组另一场赛事由意大利20斗乌拉圭U20，刚才讲过呢两队喺此组属出线热门，首战交手必擦出火花。乌拉圭阵中有唔少好波之人，包括即将加盟祖云达斯嘅进攻中场宾坦古亚、现效力皇马B队嘅华维迪及身穿10号波衫嘅迪亚高阿马路等等，论质素唔会输蚀得过意大利，平手盘捧乌拉圭。