意盃:羅馬明恰萊切大開殺戒
时间：2022-01-20 14:09 来源：足球图库
意大利盃16強，羅馬（圖）主場迎戰乙組球隊萊切，羅馬今季奪取意甲冠軍機會渺茫，相信教練摩連奴會更加重視盃賽，力爭首季領軍就有錦標落袋，以顯示身價，今仗勢必強攻對手。至於萊切狀態亦不俗，近4場作客更加贏咗3場，加上雙方近5次對賽有4次總入球達3球或以上，首選中位數2.5球嘅入球大。(周五凌晨4時開賽)
爭標無望埋手盃賽
羅馬喺聯賽已經落後榜首國際米蘭15分，兼踢多1場，基本上爭標無望，如果主帥摩連奴想捧盃，惟有向盃賽埋手。事實上，羅馬今季踢盃賽有不俗表現，包括已經進身歐協聯16強，以摩帥嘅好勝性格，絕對唔會放過任何奪冠機會，例如佢2016/17年度執教曼聯首季，就奪得英聯盃及歐霸盃冠軍，自然想重演好戲。
同埋摩連奴已經改變以往保守戰術，羅馬喺佢領軍之下，踢法非常悅目，早前意甲就同祖雲達斯合力創造7個入球，要撕開萊切防線並唔困難。
不過，羅馬主攻嘅同時，防線難免比較空虛，近5場比賽僅1場不失球。加上萊切屬於意乙前列球隊，近5場贏4場，表現並唔失禮，未必會捱打，就算輸波，都好大機會可以破蛋，主W太熱冇肉食，最好揀入球大。
