大邱尚州細均力敵

2020/05/29文:Mic少

ＦＣ大邱後衞鄭泰旭

韓職今日上演獨腳戲，FC大邱主場迎戰尚州尚武，大邱開鑼後未開齋，而且只入1球，特別係巴西前鋒施仙夏費蘭度受傷，削弱球隊入球能力，想攻陷客隊城池難度極高。尚州擅踢穩守突擊，今場中位數2.5球嘅入球細，開出機會高。（myTV SUPER周五晚6時30分直播）

大邱開季3場聯賽僅2和1負，包括打和仁川聯0比0，鋒力甚為疲弱，看守教練李柄根目前飽受壓力。38歲鋒線老將丹恩奴域連續2場喺半場期間入替，可見李柄根對正選球員表現並唔滿意。

鋒力弱難見「800入球」
可惜丹恩奴域體力始終有限，未必可以為大邱應付全場激戰，兼且主力前鋒施仙夏費蘭度受傷，中場金善珉停賽，進一步減低球隊調動靈活性，只差2球就達成「聯賽800入球」里程碑嘅大邱，恐怕好難喺今場書寫歷史。

由於南韓政府推出新政策，明年開始唔准同一城市內同時存在企業球隊及軍方球隊，所以尚州尚武今季將會「制度性」篤定降班。不過球員戰意未受影響，近2場比賽都贏波，分別主場以2比0擊敗FC江原，以1比0小勝FC光州，雖則演出一般，但防守穩健靠反擊搵食。翻查往績，兩隊近4次對壘，全部總入球都係2球或以下，今場再追細盤乃明智之選。