全北汽车往绩食住釜山

2020/05/14
今季韩职两大争标热门全北汽车及蔚山现代首轮齐齐赢波，不过全北汽车主场只靠后备上阵嘅李东国完场前绝杀、险胜水原蓝翼1比0，论气势似乎比唔上大炒尚州尚武4球嘅蔚山现代。由于新加盟嘅前南非国脚韦迪维积克仍有伤在身，全北汽车周六晚作客釜山偶像，可能又要靠李东国做雷霆救兵。

全北汽车今季买入韦迪维积克、梅里路汉历基及金甫炅等新兵，其中前者因伤错过上周揭幕战，后两者虽然正选上阵，但表现唔算突出，梅里路汉历基踢咗61分钟就被另一新兵邦本宜裕代替。全北汽车上场虽然控制大局，但攻势唔到肉，直至完场前15分钟，水原蓝翼嘅澳洲中场安东尼斯领红牌，全北汽车恃住人多先攞到绝对优势。全北汽车嚟紧周六晚将作客新升班嘅釜山偶像，据报韦迪维积克仲未好番，上阵机会唔大，主帅莫理斯正苦恼紧应沿用上场踢正选嘅小将赵圭成，抑或搵后备入替嘅邦本宜裕担正。

李东国又等数胡
不过无论决定係点，「狮子王」李东国始终最可靠，呢名41岁老将上场60分钟后备入替，踢到84分钟就接应角球攻势，顶入全场唯一入球，刷新自己个K联赛纪录，尽显埋门级数。原来李东国对上6次代表全北汽车上阵斗釜山偶像从未输过，一共攞到5胜1和，其中近4次个人仲攻入4球，今轮对住呢碟「私房菜」，又係数胡好时机。