盃赛叫紧胡无谓嘥力屈机
利物浦目前喺英超以22分遥遥领先，夺得30年来首个联赛冠军只係迟早嘅事，大家嘅关注力早已去咗第二度，由能否以全季不败或破纪录得分封王，去到依家希望平平安安，但愿球季唔好受到疫灾影响。今晚红军作客屈福特表面上强弱悬殊，但要轻取对手唔易，乐比拣让球和。

（Now 621周日凌晨1时30分直播）

利物浦联赛已18连胜，好多人话球队歇完冬仲「立咗」，但一支球队总有高低起伏，尤其係踏入二月欧联淘汰赛展开，下周中又要喺足总盃作客车路士，领队高普为兼顾三条战线，联赛唔会吓吓同你去尽，睇住嚟食拎3分就得，故近两仗对诺域治同韦斯咸都係小胜1粒，上场更係惊涛骇浪反胜，今场随时出现类似场面。

睇番赛程，利物浦最早可以喺下月22日主场对水晶宫锁定冠军，不过利物浦依家绝对唔心急，毕竟联赛早已成囊中物，反而欧联同足总盃仲叫紧胡，如果赢晒加埋个世冠盃做四冠王，咁就真係名留青史，甚至叻过1999年嘅曼联「三冠」，人係贪心嘅，利物浦联赛留有一手係可以理解，最紧要都係3分到手。

「大黄蜂」屈福特自从喺去年12月搵咗两位前李斯特城领队皮雅臣同莎士比亚救火后，成绩有明显改善，尤其係主场先后杀退曼联及狼队，另外逼和热刺，呢几场表现都有目共睹，虽然睇番近绩近5场未赢过，但当中有4场作客值得原谅，今仗佔主场之利，应该会顶得吓。

屈福特遇强少大败
事实上，屈福特对强队係有一手，喺去年十二月皮雅臣刚接手时，第一场波就係对利物浦，该仗利物浦虽然赢2比0，但过程踢得相当辛苦，第2球都係临完场先入，经过两个月嘅准备，加上主客互调，相信屈福特会畀到红军更大压力，今场拣让球和啱数。