队长哈利仔闹爆懒散
今晚欧国外A组关键战，榜首英格兰作客保加利亚。「三狮兵团」上仗意外输波，被破近10年外围赛不败金身，哈利卡尼都话球员衰在太懒，连队长都罕有地开口闹人，佢哋仲唔识做咩，撞正包尾嘅保加利亚，一定抢缰博反弹，加上喺今届欧国外经常于初段领先，半场客胜值得捧场。

（有线661及601台周二凌晨2时45分直播）

今届欧国外头4仗赢晒、顺风顺水嘅英格兰，上仗喺早段领先下，竟爆冷以1比2反输畀捷克，令佢哋10年来喺欧国盃及世盃嘅外围赛不败之身被打破，认真冇面。不但英国传媒要佢哋「认清现实」，唔好以为自己已重返顶级劲旅行列，连队长哈利卡尼亦忍唔住闹爆，批评全队踢得太懒散，冇晒平时嘅快速传送，仲特登提醒队友喺欧洲每次作客都唔易打，若果唔肯付出百分百，随时又阴沟裡翻船，连同上仗反胜为败，球员吸取教训后唔敢再轻敌。

保加利亚曳到冇朋友
保加利亚虽有名宿巴拉哥夫执教，可惜愈踢愈沉，就算加入云达臣同马些连奴2名入籍兵亦未见起色，今届头6场欧国外只得3和3负，若计晒各项赛事，佢哋近10仗未赢过，曳到冇朋友，依家喺A组仲排紧包尾，战意成疑。虽然上仗输波后，令打少1场嘅英格兰被捷克追到同分，只领先同样打咗5场嘅科索沃4分，但只要今仗赢波，出线机会依然好大，何况今届5场欧国外，有4次于上半场取得领先优势，最终均由头赢到尾，预计造访弱旅保加利亚会一开波即嚟料，半场客胜有买趁早。